Lleisiau Ifanc, Effaith Fawr!

Posted on by Sarah

Cefais i gyfle i gyfweld ag Evie, aelod o Senedd Ieuenctid y DU, i ddysgu mwy am ei rôl a’r materion y mae hi fwyaf angerddol amdanynt.

Y CYFWELIAD…

C. Beth mae’n ei olygu i ti fod yr Aelod sy’n cynrychioli Cymru ar y Pwyllgor Dethol Ieuenctid?
A. Mae mwy na 500,000 o bobl ifanc ar draws y genedl hon – ac mae cael eu hymddiriedaeth nhw ynof fi i gynrychioli eu barn yn effeithiol ar y Pwyllgor Dethol Ieuenctid, wrth gwrs, yn anrhydedd. Cyflawni’r swydd hon fydd fy rôl fwyaf gweithgar fel cynrychiolydd hyd yma – rwy’n bwriadu cymryd gofal a chyfrifoldeb mawr wrth siarad ac eirioli ar ran pobl ifanc Cymru.

C. Pwy sy’n dy ysbrydoli fwyaf?
A. Mae’n mynd i fod yn anodd dewis un yn unig mae gen i ofn, gan fy mod yn edmygu llawer o bobl am lawer o wahanol resymau – mae Nadia Whittome (Aelod Seneddol) er enghraifft yn gwneud llawer iawn o waith yn hyrwyddo cydraddoldeb ar draws lleoliadau seneddol. Mae Will Hayward, newyddiadurwr o Gymru, yn cynhyrchu cynnwys anhygoel ar wleidyddiaeth Cymru ac mae’n newyddion sy’n hygyrch ac o safon. Gallwn fynd ymlaen.

C. Beth wyt ti’n teimlo fwyaf angerddol amdano – a beth wyt ti am ei newid ar gyfer y dyfodol?
A. Rwy’n angerddol iawn am addysg wleidyddol – rhywbeth y cefais y fraint o drafod yn Nhŷ’r Cyffredin gyda fy nghyd-Aelodau o’r Senedd Ieuenctid. Rwy’n credu bod llawer gormod o bobl ifanc yn ymddieithrio a heb ddiddordeb yn yr union systemau sy’n eu llywodraethu. Byddwn yn sicr yn newid y ffordd y mae llywodraeth a gwleidyddiaeth yn cael eu cyflwyno yn ein cwricwlwm; mae dechrau rhaglen gynhwysfawr o lythrennedd gwleidyddol yn allweddol i wella anwybodaeth.

C. Ble wyt ti’n gweld dy hun mewn 10 mlynedd?
A. Mewn deng mlynedd, gobeithio y bydd gennyf yrfa sefydlog ym maes newyddiaduraeth – mae hyn wedi bod yn freuddwyd i mi ers peth amser.

C. Petaet ti’n cael cyfle i siarad â thi dy hun pan oeddet ti’n iau, beth fyddet ti’n ei ddweud?
A. Byddwn ni’n dweud yr hyn fyddwn ni’n ei ddweud wrth bobl ifanc Cymru – cymera bob cyfle sydd ar gael i ti – mwynha bob profiad, a bydd yn garedig, bob amser.

Diolch i Evie am ateb fy ngwestiynau a phob lwc gyda’ch gwaith yn y Senedd Ieuenctid y DU.

Erthygl gan
Bethan

Bydd Evie yn teithio i Lundain yr wythnos hon i fynychu cyfarfod wyneb-yn-wyneb cyntaf Pwyllgor Dethol Ieuenctid y DU, a gynhelir yn Nhy’r Senedd ddydd Iau, 18 Medi.
Mae’r digwyddiad mawreddog hwn yn nodi lansiad swyddogol proses ymchwiliad y Pwyllgor ar gyfer tymor 2025/26. Mae Evie, sy’n cynrychioli Sir Gaerfyrddin a Chymru, yn un o ddim ond 12 o bobl ifanc ledled y DU i gael ei dewis i fod ar Bwyllgor Dethol Ieuenctid dylanwadol.

Os ydych chi eisiau gwybod mwy neu gael y newyddion diweddaraf am hynt a helynt Evie yn Llundain gyda’r Pwyllgor Dethol Ieuenctid, gallwch ddilyn ei thaith a chael y diweddaraf ar ein cyfryngau cymdeithasol Facebook ac Instagram! Os oes gennych chi gwestiwn i Evie, gollyngwch hi yn y sylwadau isod, a byddwn yn gwneud ein gorau i gael ateb i chi cyn gynted ag y gallwn!

Ein Digwyddiad Blynyddol yn Margam

Posted on by Sarah

Cawsom amser anhygoel yn ein Gwersyll Haf Blynyddol! Yn ddiweddar fe wnaethon ni ddod at ein gilydd ar gyfer gwersyll gwych arall, wedi’i drefnu gan bobl ifanc, i bobl ifanc! Diolch i’n Cynllunwyr Gwersylloedd Haf a weithiodd yn galed i greu profiad bythgofiadwy llawn hwyl, dysgu, a chreu atgofion, ac rydym yn credu eu bod wedi taro’r hoelen ar ei phen!

Rydym bob amser yn edrych ymlaen at ein Gwersyll Haf, mae wedi dod yn draddodiad gwych i Gyngor Ieuenctid Sir Gaerfyrddin ddod at ei gilydd, ymlacio, a pharatoi am flwyddyn arall o wneud gwahaniaeth. Y tro hwn, aethon ni i Ganolfan Ddarganfod wych Margam ddiwedd mis Gorffennaf. Roedd yn lle perffaith ar gyfer ein cyfarfod blynyddol.

Roedd y gwersyll hefyd yn amser pwysig iawn i ni drafod busnes. Mae’n gyfle gwych i bob un ohonon ni fel Cyngor Ieuenctid gynllunio ein gwaith ar gyfer y flwyddyn i ddod a gosod ein blaenoriaethau. Fe wnaethon ni rannu syniadau, trafod yr hyn sydd bwysicaf i bobl ifanc yn Sir Gaerfyrddin, a dod i wybod sut y gallwn gael yr effaith fwyaf. Mae eich llais wrth wraidd popeth rydyn ni’n ei wneud, ac mae’r gwersyll wir wedi ein helpu i lunio ein gweledigaeth ar gyfer y misoedd nesaf.

Eleni, cawson ni lawer o hwyl gyda’r thema “Traitors”, wedi’i ysbrydoli gan y castell anhygoel ar dir Parc Margam! Fe wnaethon ni gymryd rhan mewn llwyth o gemau a thasgau adeiladu tîm cyffrous gan weithio gyda’n gilydd, meddwl yn strategol, a chael hwyl.

Roedd yn ffordd wych o gryfhau ein cysylltiadau a dod i adnabod ein gilydd hyd yn oed yn well y tu allan i’n cyfarfodydd arferol. Fe wnaeth pawb fwynhau’r thema a chymryd rhan a hynny â llawn brwdfrydedd.

Un o’r uchafbwyntiau oedd y Gweithgaredd Adeiladu Rafft! Fe wnaethon ni rannu’n dimau, paratoi ein syniadau adeiladu (glychu ein dwylo!), ac adeiladu ein rafftiau ein hunain. Roedd yn gymaint o hwyl, a hyd yn oed os nad oedd rhai ohonynt yn addas i fynd i’r dŵr, roedd yn ffordd wych o feithrin perthnasoedd a chreu rhai atgofion doniol gyda’i gilydd. Does dim byd gwell nag ychydig o gystadleuaeth gyfeillgar a chwerthin ar ddiwrnod cynnes yn yr haf.

Dywedodd ein haelod Mimi, yn dilyn y Gwersyll Haf “Fy hoff ran oedd adeiladu’r rafft, gan ei fod yn ein helpu i weithio fel tîm wrth gael llawer o hwyl!  Roeddwn i’n teimlo bod y thema Traitors wedi arwain at lawer o sgyrsiau ac wedi helpu i gysylltu pawb a oedd yn bresennol”

Nid yw Parc Margam yn ymwneud â chestyll a llynnoedd yn unig; mae hefyd yn gartref i rai creaduriaid annwyl! Fe wnaethon ni dreulio peth amser ar Lwybr y Fferm, yn cael cwrdd ag anifeiliaid anwes fel geifr a hyd yn oed rhai alpacas hyfryd! Fe wnaethon ni hefyd weld rhai o’r anifeiliaid sydd wedi bod hiraf ym Mharc Margam, yr hwyaid a’r ceirw mawreddog. Roedd yn ffordd wych o ymlacio a chysylltu â natur ar ôl ein holl gynllunio a’n gweithgareddau, a seibiant gwych o dasgau’r “Traitors”.

Cawson ni brofiad haf bythgofiadwy! Roedd ein Gwersyll Haf yn anhygoel! Cawson ni hwyl, gwnaethon ni ffrindiau newydd, cryfhau ein cysylltiadau, a chreu gweledigaeth clir ar gyfer sut rydyn ni’n mynd i barhau i wneud gwahaniaeth i bobl ifanc yn Sir Gaerfyrddin.  Gallwch weld rhai o’r atgofion a wnaethon ni yn yr albwm lluniau isod.

Cadwch lygad ar ein cyfryngau cymdeithasol a’n gwefan i gael y wybodaeth ddiweddaraf am ein prosiectau nesaf a sut y gallwch gymryd rhan yng Nghyngor Ieuenctid Sir Gaerfyrddin!

Byddem wrth ein bodd yn clywed gennych chi – pa fath o weithgareddau hoffech ein gweld ni’n eu cynnal nesaf? Gadewch eich syniadau yn y sylwadau.

ORIEL EIN GWERSYLL HAF 2025

Lluniau wedi’u darparu gan Sam K

Evie yn cynrychioli Sir Gâr a Chymru ar Bwyllgor Ieuenctid Cenedlaethol

Posted on by Sarah

Mae gan Evie Somers, 17 oed o Gaerfyrddin, newyddion cyffrous. Mae hi newydd gael ei dewis gan Senedd y Deyrnas Unedig a’r Asiantaeth Genedlaethol Ieuenctid i ymuno â Phwyllgor Dethol Ieuenctid y DU am dymor 2025/26.

Mae Evie wedi bod yn rhan o Gyngor Ieuenctid Sir Gaerfyrddin am y ddwy flynedd ddiwethaf, gan siarad yn angerddol am bryderon a syniadau pobl ifanc leol. Nawr, mae hi ar fin cynrychioli Sir Gâr a Chymru ar lwyfan cenedlaethol, a hi fydd y person ifanc cyntaf o’r sir i gael y rôl bwysig hon.

Mae’r Pwyllgor Dethol Ieuenctid yn fenter seneddol sy’n caniatáu i bobl ifanc 14-19 oed o wahanol rannau o’r DU graffu a chynnal ymchwiliadau ar bynciau pwysig, gan roi llais i bobl ifanc mewn materion sy’n effeithio arnyn nhw. Mae’r pwyllgor yn ymchwilio i wahanol faterion, fel iechyd meddwl, addysg, newid yn yr hinsawdd, a hyd yn oed effaith y cyfryngau cymdeithasol ar drais gan bobl ifanc.

Mae’r Pwyllgor Dethol Ieuenctid yn adlewyrchu prosesau Pwyllgorau Dethol Tŷ’r Cyffredin ac mae’n cynnwys 12 o bobl ifanc. Bydd yr aelodau yn casglu tystiolaeth o wahanol ffynonellau, gan gynnwys academyddion, swyddogion y llywodraeth ac arbenigwyr, cyn llunio adroddiad gydag argymhellion a fydd yn cael ei gyflwyno yn syth i’r llywodraeth.

Fe wnaeth Evie, sy’n falch o gynrychioli Sir Gâr a Chymru, gymryd rhan yn ei chyfarfod ar-lein cyntaf yn gynharach yr wythnos hon a bydd yn cymryd ei sedd yn Senedd y DU yn Llundain ym mis Medi ar gyfer sesiwn wyneb yn wyneb gyntaf y pwyllgor.

Dywedodd: “Hoffwn i ddiolch i Senedd y DU a’r Asiantaeth Genedlaethol Ieuenctid am fy newis i. Ar ôl cael fy newis fel unig gynrychiolydd Cymru ar y pwyllgor unigryw hwn, rwy’n addo rhoi buddiannau Cymru yn gyntaf yn fy ngwaith. Yn ystod fy nghyfnod yn y swydd, fy nod i yw cyfuno ymrwymiad i Gymru ar lawr gwlad a chynrychiolaeth genedlaethol gyson a diwyro.”

Dywedodd yr Aelod Cabinet dros Addysg a’r Gymraeg, y Cynghorydd Glynog Davies: “Rydyn ni’n hynod falch o weld Evie yn cynrychioli Sir Gâr a Chymru ar lwyfan cenedlaethol mor bwysig. Mae ei hymroddiad a’i hangerdd dros faterion pobl ifanc yn wirioneddol ysbrydoledig. Mae’r cyfle hwn nid yn unig yn dangos ymrwymiad Evie ond yn tynnu sylw at y cyfraniadau gwerthfawr y gall pobl ifanc o’n cymuned eu gwneud i lunio polisïau sy’n effeithio arnyn nhw. Edrychwn ymlaen at ei chefnogi wrth iddi dderbyn y rôl bwysig hon.”

Rydyn ni’n falch iawn o Evie, sef y person ifanc cyntaf o Sir Gâr i gael ei ddewis, sy’n gyflawniad anhygoel. Mae cael eich dewis nid yn unig yn gyflawniad mawr, mae’n gyfle enfawr i dyfu, cysylltu a dylanwadu ar y materion sy’n effeithio ar bob un ohonom ni. Bydd y cyfle hwn yn rhoi profiadau gwych iddi, ac rydyn ni’n edrych ymlaen at barhau i gefnogi Evie ac yn dymuno pob llwyddiant iddi!

Edrychwch am y newyddion diweddaraf ar ein cyfrifon cyfryngau cymdeithasol @YouthSirGâr, lle byddwn ni’n rhannu uchafbwyntiau taith Evie gyda’r Pwyllgor Dethol Ieuenctid!

Ein Llais: Zine Dysgu Fywyd Go Iawn

Posted on by Sarah

Mae Ein Llais, Ein Pleidlais, Ein Dyfodol yn brosiect wedi’i greu gan Gyngor Ieuenctid Sir Gaerfyrddin sy’n rhoi cyfle i bobl ifanc yn Sir Gaerfyrddin bwysleisio’r materion sy’n bwysig iddyn nhw. Mae ein prosiect yn ymwneud â sicrhau bod ein lleisiau’n cael eu clywed a’u hystyried gan y rhai sy’n gwneud penderfyniadau, gyda’r nod o wella’r gwasanaethau rydym ni’n eu defnyddio neu i wneud gwahaniaeth i’r materion sy’n effeithio ar ein bywydau. Rydym ni’n siarad am bethau fel addysg, iechyd meddwl, gwasanaethau cymunedol a mwy.

Ar ôl i ni gasglu’r ymatebion i Bleidlais Ein Llais (cliciwch yma i gael gwybodaeth gefndir. [dolen i we-dudalen arall] Cafodd Dysgu Gwersi Bywyd Go Iawn yn yr Ysgol ei bleidleisio gan bobl ifanc fel y mater pwysicaf, hwn oedd mater blaenoriaeth y Cyngor Ieuenctid am y flwyddyn. Dros y 18 mis diwethaf, rydym ni wedi cwblhau ymchwil, arolygon, cynnal grwpiau ffocws, pleidleisiau a threfnu digwyddiadau i glywed yn uniongyrchol gan bobl ifanc yn Sir Gaerfyrddin

Gwnaethom ni ymgyrchu dros newid a chreu’r digwyddiad ‘Dysgu am Oes‘ i wrando ar farn a phrofiadau pobl ifanc am y gwersi bywyd go iawn yn eu lleoliadau addysg. Wedi’i gynnal ym mis Chwefror 2025, roedd y digwyddiad Ein Llais: Dysgu am Oes yn llwyddiant mawr, wedi’i gefnogi gan nifer o’n Hysgolion Uwchradd, Penderfynwyr a Rheolwyr Adran Addysg Cyngor Sir Caerfyrddin, a fu’n gweithio gyda’i gilydd a chymryd rhan mewn gweithgareddau i gasglu eu hadborth ar eu profiadau gyda gwersi bywyd go iawn mewn ysgolion.

Dywedodd ein haelod, Bethan: “Ces i’r cyfle i gynnal y digwyddiad, ac roeddwn i’n nerfus cyn dechrau ond ar ôl peth amser enillais i fwy o hyder i siarad o flaen y bobl ifanc, yr athrawon a’r gwesteion. Roedd hefyd yn ddiddorol clywed y gwahanol safbwyntiau o wahanol ysgolion. Rwy’n credu ei bod yn ddiddorol iawn bod un ysgol yn cael ei dysgu rhywbeth gwahanol i ysgol arall.

Rydym yn hapus i rannu gyda chi ein Zine Dysgu Go Iawn a gwblhawyd yn ddiweddar ar y canfyddiadau a’r adborth a gawsom gan bobl ifanc a ddaeth i’r digwyddiad.

Mae’r Zine yn rhannu barn ar y canlynol:
★ Pa wersi bywyd mae pobl ifanc yn meddwl eu bod wedi’u dysgu yn yr ysgol.
★ Archwilio safbwyntiau ar yr heriau a’r cyfleoedd sydd eu hangen i lywio drwy fywyd bob dydd.
★ Dangos meysydd fel sgiliau digidol mewn gwaith yn y dyfodol, heriau cymdeithasol ac emosiynol y mae angen eu gwella.

Cliciwch yma i ddarllen ein Zine Dysgu Go Iawn.

Drwy gynnal “Ein Llais, Ein Pleidlais, Ein Dyfodol”, rydym ni’n sicrhau bod anghenion pobl ifanc yn parhau i fod wrth wraidd penderfyniadau lleol. Ein dyfodol yw hyn felly gadewch i ni wneud y mwyaf o’r cyfle!Rydym yn falch iawn o fynd i gyfarfodydd Penaethiaid Ysgolion Sir Gaerfyrddin cyn yr haf i rannu ein canfyddiadau a thynnu sylw at y rheiny sy’n gallu gwneud gwahaniaeth.

I fod yn rhan o’r sgwrs, gadewch sylw isod neu dilynwch ni ar y cyfryngau cymdeithasol

Erthygl gan
Bethan Jones 

Rydym Ni’n Cyfrif… Rydym Ni’n Gwneud Gwahaniaeth

Posted on by Sarah

Rydym wedi bod yn gweithio gyda Foothold Cymru yn ddiweddar i sefydlu Cyngor Ieuenctid Sir Gaerfyrddin fel lleoliad gwirfoddoli i gydnabod cyfraniad, amser a gwaith caled ein haelodau. Rydym mor falch o’n haelodau sydd wedi cofrestru ar gyfer eu Prosiectau Volunteens. Mae Volunteens yn blatfform sy’n cysylltu pobl ifanc â chyfleoedd gwirfoddoli ystyrlon, lle gall pobl ifanc ddatblygu sgiliau bywyd newydd a rhoi yn ôl i’w cymunedau drwy wirfoddoli.

Mae ein haelodau sydd rhwng 11 a 21 oed yn neilltuo ac yn cyfrannu llawer o amser at y gwaith hawliau plant a chyfranogiad ar lefel leol, ranbarthol a chenedlaethol ac mae’r prosiect Volunteens yn ein helpu i ddathlu a chydnabod ein horiau gwirfoddoli a’r amser rydyn ni wedi’i roi. Rydym am i’n haelodau ystyried manteision personol gwirfoddoli a’r effaith gadarnhaol y gall ei chael ar fywydau pobl megis hyrwyddo iechyd meddwl da, meithrin ymdeimlad o berthyn, cymryd rhan yn y gymuned, a chryfhau cyfranogiad cymdeithasol yn fwy cyffredinol.

Dywedodd ein Cadeirydd Toby “mae gwirfoddoli gyda Chyngor Ieuenctid Sir Gaerfyrddin wedi chwarae rhan enfawr yn fy natblygiad i fel person. Mae wedi darparu cyfleoedd di-ri i feithrin fy hyder, fel traddodi areithiau, ac wedi fy ngrymuso gyda gwybodaeth hanfodol, boed yn cydnabod arwyddion a symptomau cam-drin domestig i amddiffyn fy hun neu ddysgu sut i roi llais i bobl ifanc eraill.”

Ychwanegodd Toby hefyd “Mae’r gwaith rydyn ni’n ei wneud yng Nghyngor Ieuenctid Sir Gaerfyrddin yn amhrisiadwy, nid yn unig wrth fynd i’r afael â materion allweddol ond hefyd wrth hyrwyddo twf a datblygiad pobl ifanc yn gyffredinol. Mae’n hanfodol bod ein hymdrechion yn cael eu cydnabod, gan eu bod yn creu newid parhaol ym mhobl ifanc Cyngor Ieuenctid Sir Gaerfyrddin a’r gymuned ehangach.”

Ychwanegodd ein haelod Kaya fod “gwirfoddoli gyda’r Cyngor Ieuenctid wedi gwneud i mi ddod yn berson gwell yn gymdeithasol wrth siarad ag eraill ac yn feddyliol wrth i mi ddysgu a chymryd rhan mewn cyfleoedd newydd sy’n fy helpu i ddatblygu, megis gwneud araith yn ystod y Cyfarfod Cyffredinol Blynyddol a helpodd fi gyda fy hyder trwy gydol ein grŵp a hefyd cynllunio ein digwyddiadau a helpodd fi gyda meddwl creadigol.”


Mae Volunteens yn ffordd o gydnabod yr hyn yr ydym ni wedi’i wneud ac mae’n dangos ein hymrwymiad i sicrhau bod gan blant a phobl ifanc lais yn Sir Gaerfyrddin. Ceir sawl rheswm i wirfoddoli, dyma ambell un:
★ Mae gwirfoddoli yn ffordd wych o gefnogi achos sydd yn agos at eich calon ac o ddysgu pethau newydd yr un pryd.
★ Datblygu eich profiad a’ch sgiliau a chynyddu eich hyder yr un pryd.
★ Gwneud gwahaniaeth i bobl eraill.
★ Cwrdd â phobl, cael hwyl a bod yn rhan o’ch cymuned.
★ Teimlo eich bod yn cael eich gwerthfawrogi, a gwneud gwahaniaeth.

Dywedodd Sarah Jones, Uwch-swyddog Cyfranogiad a Hawliau Plant Cyngor Sir Caerfyrddin “rydym mor ddiolchgar i Foothold Cymru am greu cynllun gwirfoddoli sy’n cydnabod amser, ymrwymiad a chyfraniad pobl ifanc Sir Gaerfyrddin. Mae’n bwysig ein bod ni’n cydnabod hyn! Mae gwirfoddoli yn agor drysau i gyfoeth o brofiadau, yn ogystal â chaniatáu i bobl ifanc ennill amrywiaeth o sgiliau, fel gwaith tîm, sy’n fuddiol ym mywyd bob dydd. Mae’n anodd cyfleu faint mae eu gwirfoddoli yn cael ei werthfawrogi gan y gwasanaeth.”

Dywedodd Kelly Tomlinson, Pennaeth Gweithrediadau Foothold Cymru “Rwy’n wirioneddol wrth fy modd â Volunteens a’r bobl ifanc rwyf wedi cael cwrdd â nhw ar hyd y ffordd. Mae’r prosiect yn edrych o’r newydd ar wirfoddoli yn seiliedig ar feddyliau a barn pobl ifanc. Mae’r wefan a llawer o’i adnoddau wedi cael eu cyd-gynhyrchu gan bobl ifanc hefyd ac yn tynnu sylw at y potensial enfawr sydd gan ein pobl ifanc a faint sydd ganddynt i’w roi. Mae hefyd wedi bod yn wych meithrin perthynas gyda llawer o sefydliadau lleol sy’n awyddus i groesawu’r Volunteens hyn. Diolch i gyllid gan Gyngor Gweithredu Gwirfoddol Cymru, Llywodraeth Cymru a Gwirfoddoli yng Nghymru, mae Volunteens bellach yn cwmpasu Sir Gaerfyrddin, Sir Benfro, Ceredigion a Phowys ac rwy’n gyffrous iawn i weld y gwahaniaeth y gall pobl ifanc ei wneud ledled Cymru.”

Mae yna gyfle gwirfoddoli ar gael i bawb ac os ydych chi’n 11 oed neu’n hŷn ac â diddordeb mewn gwirfoddoli neu os ydych eisoes yn gwirfoddoli yn Sir Gaerfyrddin ac eisiau gwybod mwy am y Prosiect Volunteens, ewch i wefan Volunteens drwy glicio yma neu cysylltwch â Kelly ar kelly@footholdcymru.org.uk.