Pobl Ifanc yn Cymryd yr Awenau yng Nghyfarfod Cyffredinol Blynyddol

Posted on by Sarah

Cynhaliwyd ein Cyfarfod Cyffredinol Blynyddol yn Neuadd y Sir ddydd Iau, 10fed o Ebrill. Roedd pobl ifanc o bob rhan o Sir Gaerfyrddin yn bresennol a chawsom gyfle i rannu ein cyflawniadau o’r flwyddyn ddiwethaf gydag Aelodau Etholedig y Cyngor Sir, Rheolwyr a Phenaethiaid Gwasanaeth o fewn yr adran Addysg a Gwasanaethau Plant.

Yn y cyfarfod gwnaethom groesawu’r Cyfarwyddwr Addysg a Phlant, Owain Lloyd i agor y cyfarfod yn swyddogol. Rydym mor ddiolchgar gan mai dyma ei Gyfarfod Cyffredinol Blynyddol cyntaf o’r Cyngor Ieuenctid ers ei benodi yn Gyfarwyddwr ym mis Hydref 2024. 

Dan gadeiryddiaeth Magda Smith, ein Cadeirydd sydd ar fin gadael y rôl, mae’r Cyfarfod Cyffredinol Blynyddol yn rhoi cyfle i Aelodau’r Cyngor Ieuenctid gyflwyno adroddiadau ac areithiau ar gyflawniadau a gwaith y Cyngor Ieuenctid dros y flwyddyn ac i bennu blaenoriaethau ar gyfer y flwyddyn i ddod. Wrth siarad yn y Cyfarfod Cyffredinol Blynyddol dywedodd Magda, sy’n 18 oed o Bentregwenlais: “Wrth edrych yn ôl, rwy’n teimlo’n hynod o falch o’r hyn rydyn ni wedi’i gyflawni gyda’n gilydd. Mae bod yn Gadeirydd Cyngor Ieuenctid Sir Gaerfyrddin wedi bod yn fraint. Mae wedi agor drysau nad oeddwn erioed wedi’u dychmygu, o gynrychioli lleisiau ifanc wrth wneud penderfyniadau i feithrin cyfeillgarwch parhaol. Rydw i wedi tyfu nid yn unig fel arweinydd ond hefyd fel person. Yn bwysicaf oll, rwy’n gobeithio fy mod wedi gwneud gwahaniaeth trwy helpu pobl ifanc i deimlo eu bod yn cael eu clywed, eu grymuso a’u hysbrydoli i greu newid. Er bod y bennod hon yn dod i ben, bydd yr effaith a’r atgofion yn aros gyda mi am oes. Rwy’n gwybod bod dyfodol Cyngor Ieuenctid Sir Gaerfyrddin yn ddiogel yn nwylo’r bobl ifanc addawol”

Mae’r deuddeg mis diwethaf wedi bod yn brysur, gydag aelodau’n gweithio ar lansio ein prosiect cam-drin domestig yn swyddogol o’r enw Codi Llais yn erbyn Trais a Phrosiect Ein Llais lle buom yn gweithio gydag Ysgolion Uwchradd i edrych ar Wersi Bywyd Go Iawn.

Rydym hefyd wedi bod yn ffodus iawn i gael Evie yn ein cynrychioli ni, Sir Gaerfyrddin a Chymru yn Nhŷ’r Cyffredin fel rhan o Senedd Ieuenctid y Deyrnas Unedig.

Yn dilyn y Cyfarfod Cyffredinol Blynyddol rydym yn falch o gyhoeddi’r newyddion cyffrous mai Bwrdd Gweithredol Cyngor Ieuenctid Sir Gaerfyrddin ar gyfer 2025 yw:
★ Toby Bithray – Cadeirydd
★ Ben Bantock – Is-gadeirydd
★ Evie Somers – Ysgrifennydd
★ Samuel Kwan – Trysorydd
★ Zach Davis – Swyddog Cyfathrebu

Dywedodd Toby, ar ôl derbyn swydd y Cadeirydd “Yn fy rôl fel Is-gadeirydd dros y deuddeg mis diwethaf, rwyf wedi bod yn falch o gynorthwyo’r Cadeirydd mewn cyfarfodydd ac arwain y bobl ifanc. Nawr rwy’n teimlo’n barod ac yn gyffrous i ddod yn Gadeirydd y Cyngor Ieuenctid fy hun. Rwy’n gobeithio parhau i ymhelaethu ar leisiau pobl ifanc yng Nghyngor Ieuenctid Sir Gaerfyrddin, a dod ag ymdeimlad pellach o gymuned o fewn y Cyngor Ieuenctid.”

Anerchodd y Cynghorydd Aled Vaughan Owen y cyfarfod i roi’r wybodaeth ddiweddaraf am y gwaith cydweithredol rhwng Cyngor Ieuenctid a Bwrdd Gweithredol Cyngor Sir Caerfyrddin, prosiect a ddatblygwyd i annog pobl ifanc i ddylanwadu ar feysydd blaenoriaeth Cyngor Sir Caerfyrddin. 

Gwnaethom hefyd groesawu’r Kelly Tomlinson o Foothold Cymru dystysgrifau i’n Cyfarfod Cyffredinol Blynyddol dystysgrifau Volunteens i’r aelodau am eu cyfraniad i Gyngor Ieuenctid Sir Gaerfyrddin. Gallwch ddarllen mwy trwy glicio yma ar yr hyn a ddywedodd aelodau’r Cyngor Ieuenctid am gofrestru ar gyfer y prosiect Gwirfoddolwyr.

Cawsom gwmni Gill Adams, Prif Reolwr y Gwasanaethau Cymorth Ieuenctid a gyflwynodd aelodau a gwblhaodd yn llwyddiannus Hyfforddiant ar Gyflwyniad i Ddiogelu a ddarparwyd gan Staff y Gwasanaeth Cymorth Ieuenctid yn ystod ein Gwersyll Haf Blynyddol y llynedd.

Roedd y Cyfarfod Cyffredinol Blynyddol hefyd yn caniatáu inni fynegi ein gwerthfawrogiad ac i ddathlu gwaith caled, ymroddiad a chyfraniad gwerthfawr cyn-aelodau’r Cyngor Ieuenctid sydd wedi gadael yn ddiweddar. Cyflwynwyd tystysgrif a Gwobr Cydnabyddiaeth i’r cyn-aelodau a oedd yn bresennol gan y Cyfarwyddwr Addysg a Phlant, Owain Lloyd.

Caewyd ein Cyfarfod Cyffredinol Blynyddol 2025 yn swyddogol gan y Cynghorydd Sir Carys Davies, Aelod Cabinet dros Faterion Gwledig, Cydlyniant Cymunedol a Pholisi Cynllunio a annerchodd y siambr gan ddweud neges gadarnhaol am bwysigrwydd parhau i fod yn llais pobl ifanc ac i hyrwyddo materion pobl ifanc yn lleol ac yn genedlaethol yn y Senedd a San steffan.

Os hoffech ragor o wybodaeth neu os oes gennych ddiddordeb mewn bod yn rhan o Gyngor Ieuenctid Sir Gaerfyrddin, cysylltwch â ni trwy e-bostio info@sirgar.gov.uk neu anfonwch neges ar unrhyw un o’n llwyfannau Cyfryngau Cymdeithasol Facebook, Instagram neu X.

Evie Yn Ymuno Â’r Ddadl Genedlaethol Yn Nhŷ’r Cyffredin

Posted on by Sarah
Gydag angerdd a phwrpas: Evie yn siarad ar lythrennedd gwleidyddol yn Eistedd Flynyddol Senedd Ieuenctid y DU yn Nhŷ’r Cyffredin

Roedd ein haelod, Evie Somers, o Gaerfyrddin yn cynrychioli Sir Gaerfyrddin yn eisteddiad blynyddol Senedd Ieuenctid y DU yn Nhŷ’r Cyffredin, San Steffan. Cynhaliwyd yr eisteddiad blynyddol ddydd Gwener, 28 Chwefror 2025, ac ynghyd â 300 o aelodau’r Senedd Ieuenctid eraill, bu Evie yn trafod ac yn pleidleisio ar faterion allweddol sy’n effeithio ar bobl ifanc ledled y DU.

Etholwyd Evie yn aelod Senedd Ieuenctid Sir Gaerfyrddin ym mis Awst 2024 a bydd yn sefyll am dymor o ddwy flynedd. Mae aelodau’r Senedd Ieuenctid rhwng 11 a 18 oed ac yn cynrychioli barn eu cyfoedion.

Yn ystod yr eisteddiad blynyddol, a lywyddwyd gan lefarydd Tŷ’r Cyffredin, y Gwir Anrhydeddus Syr Lindsay Hoyle AS, bu pobl ifanc o bob rhan o’r DU, yn ogystal â Thiriogaethau Tramor Prydain a Thiriogaethau Dibynnol y Goron, yn dadlau a phleidleisio ar bum pwnc allweddol, sef:
★ Pleidleisio i bobl ifanc 16 ac 17 oed
★ Cynyddu’r isafswm cyflog
★ Cludiant am ddim i bobl ifanc
★ Yr angen am addysg wleidyddol
★ Urddas mislif i bawb

    Dywedodd Evie:“Roedd yn gymaint o anrhydedd i gynrychioli fy nghyfoedion, eu profiadau a’u lleisiau yn Nhŷ’r Cyffredin. Yn ystod diwrnod a oedd yn llawn dadl angerddol, cefais gyfle i gyflwyno fy araith ar bwysigrwydd llythrennedd gwleidyddol, gan dynnu sylw at y ffaith ‘nad yw democratiaeth yn gweithredu ar ddifaterwch’ a’i fod yn hytrach yn ‘ffynnu ar ymwybyddiaeth, cyfranogiad a grymuso’. Cliciwch chwarae ar y fideo isod i wylio araith angerddol Evie yn Nhŷ’r Cyffredin

    Evie yn traddodi ei haraith yn Nhŷ’r Cyffredin.

    Yn dilyn diwrnod prysur o drafod yn y Siambr, daeth y diwrnod i ben gyda Senedd Ieuenctid y DU yn gosod cynigion allweddol ar faterion sy’n effeithio ar bobl ifanc ledled y wlad, gan sicrhau bod lleisiau ieuenctid yn ganolog i drafodaethau polisi. Pleidleisiodd aelodau’r Senedd Ieuenctid i flaenoriaethu gostwng yr oed pleidleisio i 16 (ymgyrch y Deyrnas Unedig a gadwyd yn ôl) ac urddas mislif (ymgyrch ddatganoledig) fel eu hymgyrchoedd ar gyfer y flwyddyn i ddod.

    Dywedodd Syr Lindsay Hoyle, Llefarydd Tŷ’r Cyffredin, ei fod yn “falch iawn mai’r eisteddiad hwn o Senedd Ieuenctid y DU fydd y mwyaf cynhwysol a chyffrous eto”.

    Roedd y digwyddiad yn Senedd y DU yn cyd-daro â lansiad Maniffesto Senedd Ieuenctid y DU ar gyfer 2024-2026, ‘Llunio Ein Dyfodol, Heddiw Nid Yfory’, a grëwyd gan bobl ifanc yn eu cynhadledd flynyddol y llynedd, gan dynnu ar y safbwyntiau a’r materion a godwyd gan bobl ifanc o bob rhan o’r DU.

    Fel eiriolwr ymroddedig ar gyfer llais pobl ifanc, bydd Evie yn parhau i weithio ochr yn ochr â’r rhai sy’n gwneud penderfyniadau i ysgogi cynnydd yn y meysydd blaenoriaeth hyn, gan sicrhau bod lleisiau pobl ifanc yn cael eu clywed a hyrwyddo newid ystyrlon i bobl ifanc ledled Sir Gaerfyrddin, Cymru a’r DU.

    Llongyfarchwyd Evie gan y Cynghorydd Glynog Davies, Aelod Cabinet Cyngor Sir Caerfyrddin dros Addysg a’r Gymraeg, ar gynrychioli’r sir yn Senedd Ieuenctid y DU a hefyd am gael ei hethol yn aelod o Senedd Ieuenctid y DU dros Sir Gaerfyrddin.

    Am y tro cyntaf erioed, gwnaeth aelod o’r Senedd Ieuenctid hanes fel yr unigolyn ifanc cyntaf i ddefnyddio Iaith Arwyddion Prydain i draddodi ei araith yn Nhŷ’r Cyffredin. Gwnaeth dehonglydd Iaith Arwyddion Prydain gyfathrebu hyn trwy feicroffon yn siambr Tŷ’r Cyffredin.

    Rydym Yn Cyffroi Ar Gyfer Ein Cyfarfod Cyffredinol Blynyddol 2025

    Posted on by Sarah
    Our Executive Board Members. Pictured lHaelodau Bwrdd Gweithredol ni o’r chwith i’r dde: Sam Kwan – Trysorydd, Zach Davis – Swyddog Cyfathrebu, Magda Smith – Cadeirydd, Toby Bithray – Is-gadeirydd ac Evie Somers – Ysgrifennydd

    Rydym yn gyffrous i gynnal ein Cyfarfod Cyffredinol Blynyddol ar Ddydd Iau, 10 Ebrill 2025 yn y Siambr, Neuadd y Sir, Caerfyrddin am 5.00 yp.

    Rydym wedi cael ychydig fisoedd prysur ac rydym yn edrych ymlaen at ein Cyfarfod Cyffredinol Blynyddol. Bydd y Cyfarfod yn rhoi cyfle i ni edrych yn ôl ar y gwaith rydym wedi bod ynghlwm wrtho a’r cyflawniadau cadarnhaol rydym wedi’u gwneud dros y 12 mis diwethaf. Unwaith eto eleni, rydym yn ffodus i gael cefnogaeth y rhai sy’n gwneud penderfyniadau, rheolwyr ac aelodau etholedig o Gyngor Sir Caerfyrddin yn bresennol yn ein cyfarfod.

    Ymhlith y materion y mae’r Cyngor Ieuenctid wedi gweithio arnyn a’r prosiectau maen nhw’n falch ohonynt yw creu a lansiad swyddogol y ddogfen Codi llais yn erbyn trais; tynnu sylw at yr angen am wersi bywyd go iawn yn ein hysgolion fel rhan o’u prosiect ‘Ein Llais, Ein Pleidlais, Ein Dyfodol’ a chymryd rhan yn y broses o recriwtio a dewis staff. Hefyd, newydd ar gyfer eleni, maent wedi cofrestru ar Volunteens, prosiect a ddarperir gan Foothold Cymru sydd yn cydnabod eu hymrwymiad a’u hamser gwirfoddoli fel Cynghorwyr Ieuenctid. 

    Mae’n bleser gennym groesawu Owain Lloyd, Cyfarwyddwr Dros Dro Addysg a Gwasanaethau Plant i agor cyfarfod 2025 yn swyddogol ynghyd â chefnogaeth gan y Cynghorydd Glynog Davies, Aelod y Bwrdd Gweithredol dros Addysg a Phlant a fydd yn rhoi’r araith gloi swyddogol.

    Dywedodd ein Cadeirydd, Magda Smith, 18 oed o’r Pentregwenlais “mae bod yn rhan o Gyngor Ieuenctid Sir Gaerfyrddin wedi bod yn brofiad anhygoel, ac mae’r Cyfarfod Cyffredinol Blynyddol hwn yn gyfle i gydnabod ymroddiad ein haelodau. Mae gweld pobl ifanc yn siapio newid yn ysbrydoledig, ac rwy’n ddiolchgar am gyfraniadau pawb dros y 12 mis diwethaf. Rwy’n edrych ymlaen at weld sut mae’r Cyngor Ieuenctid yn adeiladu ar ein llwyddiannau yn y flwyddyn i ddod.”

    Am fwy o wybodaeth neu os oes gennych unrhyw gwestiynau cysylltwch â ni YMA

    Heddiw, nid Yfory: Senedd Ieuenctid y Deyrnas Unedig

    Posted on by Sarah
    Evie yn traddodi ei haraith yn Nhŷ’r Cyffredin yn ystod Eisteddiad Blynyddol Senedd Ieuenctid y DU

    Sawl gwaith y mae rhywun wedi dweud wrthych chi mai pobl ifanc yw’r dyfodol, mai ni, y genhedlaeth nesaf, fydd yn penderfynu’r cyfnod nesaf ac mai ni, yr ieuenctid, yw’r llwybr i’r hyn sydd o’n blaenau?

    Mae Senedd Ieuenctid y DU yn llwyr ymwrthod â’r datganiad hwn. Yn rhy aml o lawer, cawn ein disgrifio fel y newid esblygiadol sydd ar ddod ond sy’n amlwg yn methu â chyfrannu tan y “dyfodol” hwnnw.

    Mae ein maniffesto newydd, sy’n dwyn yr enw Llunio ein Dyfodol: Heddiw nid Yfory yn neges glir i’r llywodraeth. Os ni yw eich dyfodol, buddsoddwch ynom ni heddiw a byddwch yn elwa yfory.

    Adleisiwyd y neges hon ar draws Tŷ’r Cyffredin yn ystod Sesiwn Flynyddol y Senedd Ieuenctid yn ddiweddar lle siaradodd Aelodau o’r Senedd Ieuenctid o bob cwr o’r DU ar y pum dadl a nodwyd fel y rhai pwysicaf.

    Siaradais yn y siambr honno am yr angen am raglen gynhwysfawr o lythrennedd gwleidyddol gan ddweud nad yw democratiaeth yn gweithredu ar ddifaterwch, ac yn hytrach mae’n ffynnu drwy ymwybyddiaeth, cyfranogiad a grymuso.

    Araith angerddol Evie ar lythrennedd gwleidyddol yn Nhŷ’r Cyffredin yn ystod Eisteddiad Blynyddol Senedd Ieuenctid y DU 2025

    Yn ystod y cyfnod hwn o wrthdaro cynyddol, gelyniaeth wleidyddol ac ansicrwydd mawr, dylai rhaglen fel y Senedd Ieuenctid y mae ei haelodau yn darparu cynrychiolaeth flaenllaw i fwyafrif o bobl ifanc fod yn rhyddhad.

    Un o’r prif drafodaethau sy’n cael cryn sylw gan y Senedd Ieuenctid yw gostwng yr oedran pleidleisio i 16 yn y DU; dyma drafodaeth sy’n hollti barn i ddweud y lleiaf.

    Mae pobl ifanc eisoes yn cael dweud eu dweud ar bwy i’w ethol i Seneddau Cymru a’r Alban yn ogystal â’u cynghorau lleol, ond nid ydynt yn cael dweud eu dweud ar bwy i’w ethol i San Steffan.

    Wrth gael barn fy etholwyr dywedon nhw fod ‘polisïau yn cael eu llunio sy’n effeithio arnom ni – fel pobl ifanc, dylem ni gael dweud ein dweud am ein dyfodol a’n bywydau’.

    Ond, dywedodd gwrthwynebydd, ’18 ddylai fod yr oedran safonol ar gyfer pleidleisio, yn seiliedig ar aeddfedrwydd, bod yn agored i ddylanwad a diffyg gwybodaeth gyhoeddus yn gyffredinol’.

    Mae adroddiad a gyhoeddwyd gan y Gymdeithas Diwygio Etholiadol yn nodi bod ‘perygl gwirioneddol y bydd pobl ifanc 18 oed nad ydynt yn pleidleisio heddiw yn dewis peidio â phleidleisio pan fyddant yn 50 oed hefyd’.

    Gyda gwahanol farn ar y mater, ai mwy o eglurder a dealltwriaeth yw’r allwedd i ymestyn yr oedran pleidleisio, neu a fydd y DU yn gwrthod dilyn trefn Cymru a’r Alban?

    Erthygl gan
    Evie Somers

    Evie Yn Cynrychioli Sir Gâr Yn Nhŷ’r Cyffredin

    Posted on by Sarah

    Yr haf diwethaf cafodd Evie, ein Hysgrifennydd, ei hethol yn Aelod o Senedd Ieuenctid y DU Sir Gaerfyrddin a bydd yn cynrychioli’r Sir yng Nghyfarfod Blynyddol Senedd Ieuenctid y Deyrnas Unedig a gynhelir yn Nhŷ’r Cyffredin, Llundain ddydd Gwener, 28 Chwefror2025.

    Dywedodd Evie, “Mae cael y cyfle i gynrychioli eich cyfoedion, profiadau eich cyfoedion a’u lleisiau yn un o’r anrhydeddau mwyaf. Pan fyddaf yn cael sgyrsiau â’m hetholwyr ac yn rhyngweithio â nhw, rwy’n teimlo mor ffodus ac rwyf yn gwerthfawrogi fy mod yn y sefyllfa hon.”

    Mae Aelodau’r Senedd Ieuenctid rhwng 11 a 18 oed ac yn cynrychioli barn eu cyfoedion ar lefel y DU gyfan a bydd gan Evie y swydd hon am gyfnod o ddwy flynedd. Bydd Evie a dros 300 o Aelodau eraill o’r Senedd Ieuenctid o bob rhan o’r DU yn teithio i San Steffan i drafod a phleidleisio ar faterion sy’n bwysig i bobl ifanc.

    Mae Senedd Ieuenctid y DU yn darparu cyfleoedd i bobl ifanc sicrhau newid cymdeithasol trwy gynrychiolaeth ystyrlon. Mae’r Senedd yn cael ei goruchwylio gan yr Asiantaeth Genedlaethol Ieuenctid ac mae cyfranogiad Evie yn cael ei gefnogi’n lleol gan Wasanaeth Cymorth Ieuenctid Cyngor Sir Caerfyrddin.

    Wedi’i chadeirio gan Lefarydd Tŷ’r Cyffredin sef y Gwir Anrhydeddus Syr Lindsay Hoyle AS, bydd Aelodau’r Senedd Ieuenctid yn cymryd rhan mewn pum dadl, sef y pynciau y pleidleisiodd pobl ifanc ledled y DU drostynt. Bydd Aelodau’r Senedd Ieuenctid yn blaenoriaethu dau o’r pum pwnc a drafodir ar gyfer ymgyrchoedd cenedlaethol Senedd Ieuenctid y DU.

    Y 5 mater i’w trafod yn y Cyfarfod Blynyddol yw:

    ★ PLEIDLEISIO (Mater y DU)
    Dylid caniatáu i bobl ifanc 16 ac 17 oed bleidleisio ym mhob etholiad a refferendwm, ynghyd â darparu mwy o addysg wleidyddol drwy gydol eu cyfnod yn yr ysgol.

    ★ ISAFSWM CYFLOG (Mater y DU)
    Dylid codi’r Isafswm Cyflog Cenedlaethol ar gyfer pob gweithiwr o dan 22 oed er mwyn cyd-fynd â’r Cyflog Byw Cenedlaethol ar gyfer y rhai dros 22 oed.

    ★ TRAFNIDIAETH (Mater datganoledig)
    Dylai holl drafnidiaeth gyhoeddus fod yn rhad ac am ddim i bobl ifanc.

    ★ ADDYSG WLEIDYDDOL (Mater datganoledig)
    Rhaid i bob person ifanc yn y DU gael mynediad at lefel safonol o lythrennedd gwleidyddol ac addysg ddemocrataidd i wella diddordeb mewn gwleidyddiaeth yn lleol, yn genedlaethol ac yn rhyngwladol i ddatblygu sgiliau meddwl beirniadol.

    ★ URDDAS MISLIF (Mater datganoledig)
    Er mwyn sefydlu urddas mislif, dylai cynhyrchion mislif o ansawdd da fod ar gael am ddim ac yn hygyrch mewn mannau cyhoeddus i bawb.

    Dywedodd Evie “Ers cael fy ethol, mae’r pum mis diwethaf wedi bod yn gyffrous, o ran cyfarfod ag Aelodau rhanbarthol y Senedd Ieuenctid o Gymru a dod i’w hadnabod, ac i raddau, wedi teimlo’n gryn dipyn o brofiad. Er enghraifft, mynychu’r Gynhadledd Flynyddol ym mis Hydref 2024 oedd fy nhro cyntaf yn cyfarfod ag Aelodau’r Senedd Ieuenctid o bob rhan o’r DU, ac mewn dau ddiwrnod gwnaethom ein maniffesto cyfan. Mae sefyllfaoedd fel y rheiny yn tueddu i’m hatgoffa o’m dyletswyddau etholedig a’m hatebolrwydd i bobl ifanc Sir Gaerfyrddin.”

    Mae Evie yn edrych ymlaen at y Cyfarfod Blynyddol, ac mae’n teimlo mai ei dyletswydd etholedig yw diogelu lleisiau pobl ifanc, ac mae’n credu bod pobl ifanc yn cynnig yr hyn sy’n aml yn gallu bod yn safbwynt gwerthfawr iawn ynghylch materion na all oedolion ei gynnig; bydd holl bobl ifanc Sir Gaerfyrddin ar flaen ei meddwl yn ystod y digwyddiad pwysig hwn.

    Dyma sut i gael y wybodaeth ddiweddaraf neu i ddilyn y cyffro wrth iddo ddigwydd;
    ★ GWYLIWCH: Cyfarfod Blynyddol Senedd Ieuenctid y DU yn Nhŷ’r Cyffredin ddydd Gwener, 28 Chwefror ar Parliament TV neu ar cyfryngau cymdeithasol Parliament TV – cliciwch yma!

    ★ SGWRS: Gallwch gael y wybodaeth ddiweddaraf am Ddiwrnod Evie trwy ddilyn #CarmsHoC25 ar y cyfryngau cymdeithasol. 

    ★ EWCH I: I gael rhagor o wybodaeth am Senedd Ieuenctid y Deyrnas Unedig, gallwch fynd i’r wefan drwy glicio yma www.nya.org.uk/ukyp