Os ydych chi rhwng 11 ac 18 oed ac yn byw yn Sir Gaerfyrddin, mae’n siŵr bod gennych restr o bethau y byddech chi’n eu newid am eich cymuned pe baech chi’n gyfrifol amdani. Wel, dyma’ch cyfle i ddylanwadu ar y newidiadau hynny.
Rydyn ni’n falch iawn o lansio Ein Llais, Ein Pleidlais, Ein Dyfodol 2. Nid arolwg sy’n cael ei anghofio yw hwn; mae’n gyfle i ddweud wrth y rhai sy’n gwneud penderfyniadau yn union beth sydd angen ei newid. Eich pleidlais chi sy’n penderfynu prif flaenoriaeth y Cyngor Ieuenctid am y flwyddyn, a bydd y Cyngor yn gweithio ar lawr gwlad i droi’r canlyniad hwnnw yn newid go iawn i bobl ifanc ledled y sir.
BETH YW’R PRIF FATERION?
Yr hydref diwethaf, bu’r Cyngor Ieuenctid yn treulio amser yn gwrando ar eraill o bob cwr o’r sir. O’r sgyrsiau hynny, rydyn ni wedi creu rhestr fer o bum prif bwnc. Nawr, chi sydd i ddewis pa un sydd fwyaf pwysig:
★ CYNYDDU’R DEFNYDD O’R GYMRAEG YMHLITH POBL IFANC
Hyrwyddo mwy o siarad Cymraeg ar draws sefydliadau ieuenctid ac ysgolion i fynd i’r afael â’r dirywiad yn nifer y siaradwyr Cymraeg.
★ CAEL GWARED O DLODI BWYD
Rhoi hwb i wirfoddoli gyda banciau bwyd, mwy o gefnogaeth gyda thlodi bwyd adeg gwyliau ysgol, prydau fforddiadwy mewn ysgolion a cholegau.
★ MWY O GEFNOGAETH AR GYFER STRAEN ARHOLIADAU
Darparu mwy o sesiynau ysgol ar lesiant, strategaethau i ymdopi â straen, a thechnegau adolygu effeithiol.
★ CYNYDDU YMGYSYLLTIAD CYMUNEDOL I BOBL IFANC
Gwneud pobl ifanc yn ymwybodol o weithgareddau lleol a’u hannog i gymryd rhan.
★ CREU MWY O LEOEDD I BOBL IFANC
Datblygu mannau awyr agored wedi’u cynllunio ar gyfer pobl ifanc, agor neuaddau tref, a chreu parciau sy’n addas ar gyfer y rhai sy’n 12 oed a hŷn.
PAM DDYLWN I BLEIDLEISIO?
Yn 2023, cymerodd dros 5,200 ohonoch ran yn fersiwn gyntaf y prosiect hwn. Roedd yr un llais cryf hwnnw’n ei gwneud yn anodd i bobl sy’n gwneud penderfyniadau yn y sir anwybyddu’r hyn a ddywedodd y bobl ifanc. Trwy gymryd rhan a bwrw eich pleidlais y tro hwn, rydych chi’n helpu i benderfynu pa un o’r pum pwnc fydd yn brif flaenoriaeth i’r Cyngor Ieuenctid ar gyfer y flwyddyn i ddod. Bydd y pwnc buddugol yn arwain at ymgyrchoedd a phrosiectau go iawn sy’n anelu at wneud gwahaniaeth yn Sir Gaerfyrddin.
SUT I FOD YN RHAN O HYN!
★ Pleidlais Ar-lein: Cliciwch yma i fwrw eich pleidlais ar y papur pleidleisio ar-lein
★ Cyfle i’ch grŵp gymryd rhan: Os ydych chi’n rhan o glwb neu brosiect, gallwch lawrlwytho’r papur pleidleisio yma i gael pawb i bleidleisio.
★ Rhowch wahoddiad i ni: Os ydych chi am i ni ddod i’ch ysgol neu brosiect ieuenctid i glywed eich barn yn bersonol, cysylltwch â ni yma i drefnu ymweliad.
Mae’r cyfnod pleidleisio ar agor nawr a bydd yn aros ar agor tan 14 Mawrth 2026. Bydd y canlyniadau’n cael eu datgelu yn ein Cyfarfod Cyffredinol Blynyddol ym mis Mawrth 2026.
Gallwch gael y wybodaeth ddiweddaraf a gweld beth mae pobl ifanc eraill yn ei ddweud trwy ddilyn #EinLlais2SirGâr ar y cyfryngau cymdeithasol.
